აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია, ბათუმში, საქართველოს ახალგაზრდული ოლიმპიური ფესტივალის გახსნის საზეიმო ცერემონიას დაესწრო.

ღონისძიებაზე დამსწრე საზოგადოებას მისასალმებელი სიტყვით საქართველოს ეროვნული ოლიმპიური კომიტეტის პრეზიდენტმა, ოლიმპიურმა ჩემპიონმა ლერი ხაბელოვმა, აჭარის მთავრობის თავმჯდომარე ზურაბ პატარაძემ, საქართველოს სპორტის მინისტრმა შალვა გოგოლაძემ და საქართველოს ახალგაზრდული ოლიმპიური ფესტივალის საორგანიზაციო კომიტეტის თავმჯდომარე ელგუჯა ბერიშვილმა მიმართეს.

ფესტივალის გახსნის ცერემონიაზე, ოლიმპიურმა, მსოფლიო და ევროპის ჩემპიონმა და პრიზიორმა სპორტსმენებმა საზეიმოდ აღმართეს საქართველოს ეროვნული ოლიმპიური კომიტეტის დროშა. ასევე გაიმართა ოლიმპიური ფიცის დადების ცერემონია და შესრულდა საქართველოს სახელმწიფო ჰიმნი.

ღონისძიებას აფხაზეთის ავტონომიური რესპუბლიკის მთავრობის წარმომადგენლები, ცენტრალური და ადგილობრივი ხელისუფლების წარმომადგენლები, ოლიმპიური კომიტეტის წევრები, მწვრთნელები, ახალგაზრდა სპორტსმენები, სხვადასხვა რეგიონის დელეგაციები და სხვა მოწვეული სტუმრები ესწრებოდნენ.

ფესტივალში, სპორტის 17 სახეობაში, საქართველოს ყველა რეგიონიდან ერთმანეთს 1200-მდე სპორტსმენი შეეჯიბრება. აფხაზეთის ავტონომიური რესპუბლიკის სპორტული ფედერაციების სახელით, სპორტის 10 სახეობაში, 14 მწვრთნელის ხელმძღვანელობით, 63 სპორტსმენი მონაწილეობს.

საქართველოს ახალგაზრდული ოლიმპიური ფესტივალი საქართველოს ეროვნული ოლიმპიური კომიტეტის ინიციატივითა და საქართველოს მთავრობის მხარდაჭერით იმართება.

აფხაზეთის ავტონომიური რესპუბლიკის განათლებისა და კულტურის მინისტრის პირველი მოადგილე გური ბაქრაძე, ანბანის ბაღში, ბავშვთა დაცვის საერთაშორისო დღისადმი მიძღვნილ ღონისძიებას დაესწრო, რომელიც სოხუმის დიმიტრი არაყიშვილის სახელობის სამუსიკო სასწავლებლის ორგანიზებით გაიმართა.

მინისტრის პირველმა მოადგილემ მოზარდებს ბავშვთა დაცვის საერთაშორისო დღე მიულოცა, ბედნიერი ბავშვობა და წარმატებული მომავალი უსურვა.

გური ბაქრაძემ ასევე აღნიშნა, რომ თითოეული ახალგაზრდის მხარდაჭერა, მათი ნიჭისა და ინტერესების წახალისება საზოგადოების საერთო პასუხისმგებლობაა და მსგავსი ღონისძიებები მნიშვნელოვან როლს ასრულებს მომავალი თაობის კულტურული და მოქალაქეობრივი ცნობიერების ჩამოყალიბებაში.

ღონისძიების ფარგლებში, სამუსიკო სასწავლებლის მოსწავლეებმა დამსწრე საზოგადოებას მრავალფეროვანი მუსიკალური და ქორეოგრაფიული პროგრამა წარუდგინეს.

ღონისძიებას აფხაზეთის ავტონომიური რესპუბლიკის განათლებისა და კულტურის სამინისტროს წარმომადგენლები, პედაგოგები, მშობლები და მოწვეული სტუმრები ესწრებოდნენ.

საქართველოს ეროვნული ოლიმპიური კომიტეტის ახალგაზრდულ ოლიმპიურ ფესტივალში აფხაზეთის გუნდების მონაწილეობის საკითხთან დაკავშირებით სამუშაო შეხვედრა გაიმართა. შეხვედრას აფხაზეთის ა/რ განათლებისა და კულტურის მინისტრი გიორგი ძაძამია დაესწრო.

სამუშაო შეხვედრაზე ყურადღება გამახვილდა ფესტივალის რეგლამენტსა და საქართველოს ეროვნული ოლიმპიური კომიტეტის მიერ დადგენილ ძირითად მოთხოვნებზე. შეხვედრის მონაწილეებმა ტურნირის საორგანიზაციო ეტაპები და გუნდების საერთო მზადყოფნა დადებითად შეაფასეს.

გიორგი ძაძამიამ სპორტსმენებსა და მწვრთნელებს მხარდაჭერა გამოუცხადა, ასევე, ნაყოფიერი ასპარეზობა და გამარჯვება უსურვა.

მინისტრთან ერთად შეხვედრას აფხაზეთის რეგიონალური ოლიმპიური ორგანიზაციის თავმჯდომარე ვიტალი ბენდელიანი, აფხაზეთის რეგიონალური ოლიმპიური ორგანიზაციის გენერალური მდივანი ირაკლი ცხოვრებაშვილი, კულტურის, სპორტისა და ახალგაზრდული პოლიტიკის სამსახურის წარმომადგენლები, აფხაზეთის სახელით მოასპარეზე გუნდების მწვრთნელები და ახალგაზრდა სპორტსმენები ესწრებოდნენ.

ბათუმში, 2-6 ივნისს, ახალგაზრდულ ოლიმპიურ ფესტივალზე სპორტის 10 სახეობაში, აფხაზეთის ავტონომიური რესპუბლიკის სპორტული ფედერაციების სახელით 63 სპორტსმენი წარდგება, რომელთა ასპარეზობასაც 14 მწვრთნელი უხელმძღვანელებს.

აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია, პირველ მოადგილე გური ბაქრაძესთან ერთად, ფოთში, აკაკი ჩხენკელის სახელობის აფხაზეთის №21 საჯარო სკოლაში სასწავლო წლის შემაჯამებელ ღონისძიებას დაესწრო.

სკოლის მოსწავლეების მონაწილეობით აფხაზეთის თემატიკისადმი მიძღვნილი ღონისძიება „ჩვენ ვაშენებთ მომავალს“ გაიმართა, რომელიც კულტურულ მემკვიდრეობასთან, პატრიოტიზმთან და ჰუმანიზმთან დაკავშირებულ საკითხებს აერთიანებდა.

ღონისძიების ფარგლებში, მოსწავლეებსა და დამსწრე საზოგადოებას სიტყვით აფხაზეთის განათლებისა და კულტურის მინისტრმა და მინისტრის პირველმა მოადგილემ მიმართეს.

გიორგი ძაძამიამ დაწყებითი საფეხურის მოსწავლეებს მნიშვნელოვანი სასწავლო ეტაპის დასრულება მიულოცა, ხოლო მე-12 კლასის მოსწავლეებს ცხოვრების ახალ ეტაპზე წარმატება უსურვა. მან ასევე, ხაზი გაუსვა განათლების, კულტურისა და ეროვნული ფასეულობების განსაკუთრებულ მნიშვნელობას ახალგაზრდების პიროვნულ და პროფესიულ განვითარებაში.

აფხაზეთის ავტონომიური რესპუბლიკის განათლებისა და კულტურის მინისტრს ახალი მოადგილე ჰყავს. მინისტრის პირველი მოადგილის თანამდებობაზე გური ბაქრაძე დაინიშნა.

ახლად დანიშნული პირველი მოადგილე აფხაზეთის ავტონომიური რესპუბლიკის განათლებისა და კულტურის მინისტრმა გიორგი ძაძამიამ სამინისტროს თანამშრომლებს დღეს ოფიციალურად წარუდგინა.

გური ბაქრაძეს განათლება მიღებული აქვს საერთაშორისო ურთიერთობებისა და პოლიტიკური ფილოსოფიის მიმართულებით. მას საჯარო სექტორში მუშაობის მრავალწლიანი გამოცდილება აქვს, მათ შორის საქართველოს თავდაცვის სამინისტროში. სხვადასხვა პერიოდში იგი ანალიტიკოსისა და პროექტების მენეჯერის პოზიციებს იკავებდა, ასევე ხელმძღვანელობდა არაერთ მნიშვნელოვან პროექტს.

„აფხაზეთობა 2026“ -ის კვირეულის ფარგლებში, სენაკის აკაკი ხორავას სახელობის დრამატულ თეატრში, სოხუმის გიორგი რატიანის სახელობის მოზარდ მაყურებელთა თეატრის სპექტაკლი „ზღვის თეატრი“ გაიმართა.

სპექტაკლი მოგვითხრობს აფხაზეთიდან დევნილობაში მყოფ თეატრზე, რომელიც მთელი ძალისხმევით ცდილობს გადარჩენას და ქართული თეატრალური სივრცის ღირსეულ ნაწილად დამკვიდრებას. ისინი დგამენ სპექტაკლებს, იძენენ მაყურებლის სიყვარულსა და აღიარებას, მონაწილეობენ გასტროლებში, თუმცა მუდმივად თან სდევთ შინ დაბრუნების მოლოდინი, მონატრება და სევდა, სწორედ ისე, როგორც ზღვაში მიმავალ გემს, რომელიც კვლავ ვერ აღწევს სოხუმამდე.

სპექტაკლს აფხაზეთის ავტონომიური რესპუბლიკის განათლების და კულტურის მინისტრი გიორგი ძაძამია, იძულებით გადაადგილებულ პირთა მინისტრის პირველი მოადგილე გურამ მისაბიშვილი, სენაკის მუნიციპალიტეტის მერი ვახტანგ გადელია, სენაკის მუნიციპალიტეტის საკრებულოს თავმჯდომარე ჯუმბერ ტყებუჩავა, ადგილობრივი ხელისუფლების წარმომადგენლები და სხვა მოწვეული სტუმრები ესწრებოდნენ.

„აფხაზეთობა 2026“ აფხაზეთის ავტონომიური რესპუბლიკის მთავრობის ორგანიზებით 18-დან 24 მაისის ჩათვლით საქართველოს 5 ქალაქში მიმდინარეობს. კვირეულის ფარგლებში სხვადასხვა კულტურული ღონისძიებაა დაგეგმილი, რომლებიც მუსიკალურ საღამოებს, თეატრალურ წარმოდგენებს, გამოფენებს, ლიტერატურულ და სხვა შემოქმედებით აქტივობებს მოიცავს.

სოხუმის კონსტანტინე გამსახურდიას სახელობის სახელმწიფო დრამატული თეატრის სცენაზე სპექტაკლის „აღთქმული სანაპირო“ პრემიერა გაიმართა. წარმოდგენას აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია დაესწრო.

რეჟისორ ალექსანდრე ქანთარიას სპექტაკლი „აღთქმული სანაპირო“ ტენესი უილიამსის პიესის „ტრამვაი სახელად სურვილის“ ადაპტაციას წარმოადგენს. მისი მთავარი გმირები დები, სოფი და ჰელენი არიან, რომლებიც საფრანგეთში შექმნილმა პოლიტიკურმა ვითარებამ ერთმანეთს დააშორა. სპექტაკლი წარმოადგენს მცდელობას, მაყურებელს გეოპოლიტიკური ცვლილებები არა ფაქტებიდან გამომდინარე, არამედ ადამიანური პერსპექტივიდან დაანახოს.

სპექტაკლის პრემიერას საქართველოს პარლამენტის თავმჯდომარის პირველი მოადგილე გია ვოლსკი, საქართველოს კულტურის მინისტრის პირველი მოადგილე მაკა გურგენიძე, აფხაზეთის ავტონომიური რესპუბლიკის მთავრობის, აფხაზეთის ავტონომიური რესპუბლიკის უმაღლესი საბჭოს წევრები და კულტურის სფეროს სხვა წარმომადგენლები ესწრებოდნენ.

აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია თბილისის საგუნდო მუსიკის XVI საერთაშორისო ფესტივალის ფარგლებში გამართულ კონცერტს დაესწრო.

თბილისის სახელმწიფო კონსერვატორიის მცირე დარბაზში, გურამ ყურაშვილის სახელობის აფხაზეთის სახელმწიფო კაპელამ და თურქეთის გუნდმა „რეზონანსმა“ მაყურებლის წინაშე საგუნდო მუსიკის მრავალფეროვანი პროგრამა წარმოადგინეს.

აფხაზეთის სახელმწიფო კაპელის მიერ შესრულებული სასულიერო და კლასიკური საგუნდო ნაწარმოებები საქართველოს კათოლიკოს-პატრიარქის, ილია II-ის ხსოვნას მიეძღვნა.

ღონისძიებას აფხაზეთის ავტონომიური რესპუბლიკის იუსტიციისა და სამოქალაქო ინტეგრაციის მინისტრი ალიონა ჩხოტუა, აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი ბესიკ კუსიდი, აფხაზეთის ავტონომიური რესპუბლიკის ფინანსთა და ეკონომიკის მინისტრის პირველი მოადგილე ლევან თევზაია, აფხაზეთის ავტონომიური რესპუბლიკის იძულებით გადაადგილებულ პირთა მინისტრის პირველი მოადგილე გურამ მისაბიშვილი, თურქეთის თანამშრომლობისა და კოორდინაციის სააგენტოს (TiKA) თბილისის ოფისის კოორდინატორი სალიჰ ოზერი, კულტურის სფეროს წარმომადგენლები და სხვა მოწვეული სტუმრები ესწრებოდნენ.

თბილისის საერთაშორისო საგუნდო მუსიკის ფესტივალი 2011 წელს დაფუძნდა და მისი მიზანია განავითაროს ქართული საგუნდო მუსიკა, ხელი შეუწყოს საგუნდო საშემსრულებლო ტრადიციების შენარჩუნებას, მსმენელს გააცნოს საქართველოში და მის ფარგლებს გარეთ მოღვაწე გუნდების შემოქმედება.

აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია, აფხაზეთის რეგიონის სასკოლო სპორტული ოლიმპიადის ფარგლებში გამართულ მინი ფეხბურთის ფინალურ შეხვედრას დაესწრო.

ფინალური თამაში მინი ფეხბურთში აფხაზეთის N15 საჯარო სკოლაში გაიმართა, სადაც 16 გუნდი იღებდა მონაწილეობას. პირველი ადგილი აფხაზეთის ვოვა ვეკუას სახელობის N3 საჯარო სკოლის გოგონათა და ვაჟთა გუნდებმა მოიპოვეს. მეორე ადგილი ვაჟთა კატეგორიაში აფხაზეთის ჟიული შარტავას სახელობის N6 საჯარო სკოლის გუნდს ერგო, ხოლო გოგონებს შორის - აფხაზეთის N10 საჯარო სკოლის მოსწავლეებს. მესამე ადგილი აფხაზეთის N5 საჯარო სკოლის ვაჟთა გუნდმა დაიკავა.

მატჩის შემდეგ, მინისტრმა გამარჯვებული და საპრიზო ადგილზე გასული გუნდები დიპლომებით, მედლებითა და თასებით დააჯილდოვა.

აფხაზეთის რეგიონის სასკოლო სპორტული ოლიმპიადა, აფხაზეთის განათლების და კულტურის სამინისტროს ორგანიზებით, სპორტის 5 სახეობაში ჩატარდა. ოლიმპიადის გამარჯვებული გუნდები საქართველოს სასკოლო სპორტული ოლიმპიადის ზონალურ თამაშებში მიიღებენ მონაწილეობას.

ღონისძიება ყოველწლიურად ტარდება და მოსწავლეებში ჯანსაღი ცხოვრების წესის პოპულარიზაციას, ფიზიკური აქტივობის წახალისებასა და ნიჭიერი ახალგაზრდა სპორტსმენების გამოვლენას ისახავს მიზნად.

აფხაზეთის ავტონომიური რესპუბლიკის განათლებისა და კულტურის მინისტრი გიორგი ძაძამია აფხაზეთის მხატვართა შემოქმედებითი კავშირის მიერ ორგანიზებული გამოფენის - „აფხაზური გაზაფხული“ - გახსნას დაესწრო.

ღონისძიების ფარგლებში დამსწრე საზოგადოებას სიტყვით მიმართეს აფხაზეთის ა/რ განათლებისა და კულტურის მინისტრმა, გიორგი ძაძამიამ და აფხაზეთის ა/რ უმაღლესი საბჭოს თავმჯდომარე, ჯემალ გამახარიამ. მინისტრმა გამოფენის მნიშვნელობაზე ისაუბრა და ხაზი გაუსვა მსგავსი ინიციატივების საჭიროებას.

გახსნის ცერემონიას ასევე აფხაზეთის ა/რ იძულებით გადაადგილებულ პირთა მინისტრი დავით ფაცაცია, აფხაზეთის ა/რ  განათლებისა და კულტურის მინისტრის მოადგილე სალომე კაპანაძე, აფხაზეთის უმაღლესი საბჭოს დეპუტატები, კულტურის სფეროს წარმომადგენლები და სხვა მოწვეული სტუმრები ესწრებოდნენ.

ღონისძიების დასასრულს, აფხაზეთის მხატვართა შემოქმედებითი კავშირის თავმჯდომარე, ჯემალ ბასარიამ ხელოვანებს სერტიფიკატები გადასცა და შემოქმედებით საქმიანობაში წარმატება უსურვა.

გამოფენა საქართველოს კათოლიკოს-პატრიარქის, ილია II ხსოვნას მიეძღვნა. ექსპოზიცია ფერწერულ, გრაფიკულ და ქანდაკების ჟანრში შესრულებულ ნამუშევრებს მოიცავს და მისი დათვალიერება პირველ მაისამდეა შესაძლებელი.